UHAWE IKAZE KURI RADIO INYABUTATU

Ijambo ryo kwifuriza abanyarwanda umwaka mushya muhire wa 2017

шаблоны сайтов
joomla

Banyarwanda,

Banyarwandakazi,

Nshuti z’u Rwanda,

Mw’izina ryanjye bwite no mw’izina ry’abagize Ihuriro ry’Inyabutatu-RPRK riharanira ubwami bugendera kw’itegekonshinga hifashishijwe regence, ndabifuriza umwaka mwiza mushya muhire wa 2017: uzababere mwese umwaka w’amahoro n’umunezero biturutse k’Uwiteka. Imana izabahe ibyiza byose mwifuza, izabahundazeho imigisha yayo.

Umwaka turangije wa 2016 udusigiye umubabaro n’agahinda kubera ko Umwami Kigeli V Ndahindurwa yadusize bidutunguye kandi tukimukeneye. Imana imuhe iruhuko ridashira. Hari byinshi yakoreye u Rwanda n’abanyarwanda tuzajya tumwibukiraho, muri byo reka tuvuge igikorwa cyo kw’itariki ya 9/10/59: Umwami Kigeli V Ndahindurwa yarahiriye imbere y’Inama y’igihugu irikumwe na Bwana J.P.Harroy (wari uhagarariye ubutegetsi bwa gikoloni) kuba umwami ugendera kw’itegekonshinga, aherako asinya ibyo yarahiriye, aba abaye uwa mbere muri Afurika yose!
Ubwo bwami bugendera kw’itegekonshinga, Umwami Kigeli V Ndahindurwa yarahiriye kandi akabusinyira, ni ubwami bw’amahoro, ni ubwami bumeze nk’ubwami bwo muri Yapani no mu bindi bihugu byinshi byo kw’isi, nibwo twifuza ko bugeragezwa mu Rwanda, dore ko repubulika y’u Rwanda ikunda kumena amaraso y’abanyarwanda.

Paul Kagame ategekesha iterabwoba kuko ni byo azi byonyine, kandi ni byo byonyine ashoboye. Ategekesha ubwoba kuko afite ubwoba bw'ibibi yakoreye abanyarwanda b'ingeri zose. Afite ubwoba ko abamuhaye ibitwaro n’ibifaranga bakamwicaza mu Urugwiro bashobora kumwambura ubutegetsi bakabuha undi. Nta kuntu atagira ubwoba bw’abanyarwanda batabarika yahekuye, n’abo akomeje guhonyora. Mu gihe acyicaye ku ntebe y’umukuru w’igihugu abanyarwanda bagomba kumenya ko ntakindi ashoboye usibye gutegekesha igitugu n’iterabwoba. Ntateze kuva ku ntebe y’ubutegetsi, kuko ni yo ituma adashyikirizwa ubucamanza ngo aryozwe ubwicanyi bwe ndengakamere, azayivaho ari uko apfuye. Ibi ntawe ugomba kubyibeshyaho! Yivugiye ko nibiba ngombwa Kigali azayisiga uko yayisanze yuzuyemo intumbi ishyano ryose n’umunuko wazo.

Abanyarwanda bishe abandi banyarwanda mu gihe cya jenoside. Ese byagenze gute kugirango uwarushije kure abandi kwica, umwicanyi ruharwa, umwicanyi mukuru, ahinduke perezida wa repubulika y’u Rwanda aho kujyanwa mu rukiko? Umugambi we mubisha wo kwica abanyarwanda uracyakomeza:abicisha amarozi, inzara, ubukene, uburoko, intambara z’urudaca, imiriro, udufuni, imigozi, imbunda n’inkota, imisoro y’ubwoko bwose, n’ibindi bikorwa by’ubugome ndengakamere byinshi. We ashobora kwibagirwa abo yahekuye, ariko bo ntibashobora kumwibagirwa na rimwe. Amaraso y’indengakarengane aratabaza Imana. Natwe reka dupfukame, tuzamure amaboko, duhange amaso ijuru, twinginge Imana ngo itabare u Rwanda. Amazina y’abacu bazize Paul Kagame tuyandike mu mitima yacu, tuzirikane ko icyatumye tugihumeka umwuka w’abazima ari ukugirango mu maso ya bagenzi bacu bagowe, tugaragare neza nka wa musamaritani mwiza. Abababaye tubabarane nabo, abishimye twifatanye nabo. Ariko niduhura n’abakozi ba Sekibi, tubavume, tubahungire kure, tubahe akato. Bityo dukore ibyiza gusa, ibibi tubizinukwe. Duhore twambaye ubwiza bw’Imana.

Muri politiki, naho ni uko ibintu bigomba kugenda, tugomba kurinda bikomeye imitima yacu ngo itandura. Politiki ishingiye ku bwicanyi, ibinyoma, igitugu n’iterabwoba, ubujura, ubusambanyi, n’ibindi bibi byose, ni politiki ya Sekibi. Ntabwo ikibi kigomba kutugera iruhande. Ntitugomba kwemera na gato kuba imbata y'ikibi. Nta na rimwe ikibi gishobora kubyara icyiza. Kamere y’ikibi ni ukurimbura. Politiki yo gusebanya ni politiki ya Sekibi, ni politiki y’abaswa b’ibyihebe iganisha ikuzimu, si politiki y’umuntu ufite umutima wa kimuntu, reka tuyirekere Paul Kagame n’agatsiko ke. Icyo twifuriza abadukunda ni uko twese duhora dufite roho zera de, turi abaziranenge rwose mu myitwarire yacu. Uwo ni wo murongo tugenderaho. Ntabwo politiki yacu ari politiki yo gufata impu zombi ngo twishakire amaronko. Nta maronko abaho aturutira gukunda ukuri n’ubukiranutsi. Ese kwambara ubumanzi wabigurana iki?

Turashimira byimazeyo abanyamuryango bacu n’inshuti zacu. Badufatiye runini, turabakeneye nk’uko dukeneye umwuka duhumeka. Ni bo mutima w’Ihuriro ry’Inyabutatu-RPRK. Biyuha akuya kugirango umunsi w’isarura nugera, uzabe umunsi w’ibyishimo n’umunezero. Ntawe ukora ibyo Imana ishaka watashye amara masa. Urugamba ni rurerure, ariko ibyiringiro ni byinshi.

Harakabaho u Rwanda runezejeje Imana, rufite amahoro,

Harakabaho ubwami bugendera kw’itegekonshinga mu Rwanda,

Harakabaho Ihuriro ry”Inyabutatu-RPRK.

Umukuru w’Ihuriro ry’Inyabutatu-RPRK, Yozefu Mutarambirwa.